October 24, 2018 Europa Donna Albania reagon për shkurtimin e shtretërve në Spitalin Onkologjik
Organizata Europa Donna Albania, e cila ka në fokus pacientët me kancer dhe ka si qëllim përfaqësimin dhe mbrojtjen e të drejtave të tyre, nuk është dakord me urdhrin e Qendrës Spitalore Universitare “Nënë Tereza”, Tiranë, për shkurtimin e shtretërve në Shërbimin e Onkologjisë.
Shërbimi i Onkologjisë pranë Qendrës Spitalore Universitare “Nënë Tereza”, në varësi të Ministrisë së Shëndetësisë, është përballur me një urdhër arbitrar për shkurtimin e shtretërve. Me urdhrin, Nr. 227, datë 09.08.2016, Drejtoria e QSUT-së ka urdhëruar të shkurtohen shtretërit e këtij shërbimi duke e reduktuar në 64 numrin total të tyre.
Megjithëse ka hyrë menjëherë në fuqi, ky urdhër nuk është bërë ende publik. Vendimi për shkurtimin e shtretërve është marrë pa u konsultuar me grupet e interesit dhe pa praninë e shefit të Shërbimit, Onkologjik, prof. as. dr. Agim Sollaku. Burime brenda QSUT-së bëjnë me dije se mjekët e shërbimit të Onkologjikut kanë hyrë në konflikt me drejtuesit e QSUT-së, pasi kanë kundërshtuar zbatimin e këtij vendimi.
Ndërkohë që numri i të sëmurëve me kancer po rritet në mënyrë drastike, duke arritur shifra alarmante, onkologjiku përballet me këtë vendim të cilin as nuk e kanë konsultuar me grupet e interesit. Rezulton se që nga viti 2014 në vitin 2015 ka një rritje të të sëmurëve me kancer, nga 3286 në 5158, duke dëshmuar kështu nevojën urgjente për shtimin e buxhetit për këtë kategori.
Brenda Shërbimit Onkologjik, këta të sëmurë përballen me të tjera probleme, ku më kryesori vazhdon të mbetet mungesa e medikamenteve që sjell pengesa dhe zvarritje në mjekimin e të sëmurëve sipas protokolleve të përcaktuara mjekësore.
Europa Donna Albania bën me dije se nuk do e tolerojë mosrespektimin e të drejtave shëndetësore të pacientëve me kancer. Ajo do e ngrejë zërin fort dhe do e përcjellë shqetësimin e tyre në institucionet përgjegjëse dhe në media.
Përfaqësues të kësaj organizate i bëjnë thirrje Ministrisë së Shëndetësisë dhe Drejtorisë së QSUT-së të rishikojnë vendimin për shkurtimin e shtretërve dhe të mos marrin vendime pa u konsultuar më parë me grupet e interesit dhe pa marrë në konsideratë opinionet e vetë pacientëve.