Universiteti i Sporteve të Tiranës dhe Europa Donna Albania Nënshkruajnë Marrëveshje Bashkëpunimi

Universiteti i Sporteve të Tiranës (UST) dhe Europa Donna Albania (EDA) kanë nënshkruar një marrëveshje bashkëpunimi, duke shënuar fillimin e një partneriteti të rëndësishëm që synon të promovojë shëndetin, ndërgjegjësimin dhe angazhimin e të rinjve në kauza me ndikim shoqëror.

Marrëveshja u nënshkrua nga Rektori i Universitetit të Sporteve të Tiranës, Prof. Dr. Agron Kasa, dhe Presidentja e Europa Donna Albania, Donjeta Zeqa.

Ky bashkëpunim synon zhvillimin e projekteve të përbashkëta, organizimin e seminareve dhe aktiviteteve vullnetare, si dhe shkëmbimin e eksperiencave dhe njohurive mes dy institucioneve. Një fokus i veçantë do t’i kushtohet sensibilizimit të studentëve mbi rëndësinë e promovimit të shëndetit, stilit aktiv të jetesës dhe ndërgjegjësimit për kancerin e gjirit.

Përmes kësaj marrëveshjeje, studentët e Universitetit të Sporteve të Tiranës do të kenë mundësi të angazhohen në iniciativa me ndikim në komunitet, duke kontribuar në fushata ndërgjegjësuese dhe aktivitete që mbështesin pacientët dhe familjet e tyre.

Europa Donna Albania e konsideron bashkëpunimin me institucionet akademike një element kyç për fuqizimin e brezave të rinj dhe ndërtimin e një kulture më të fortë të parandalimit, edukimit dhe solidaritetit.

Ky partneritet përfaqëson një hap të rëndësishëm drejt krijimit të mundësive të reja për studentët dhe forcimit të rolit të tyre si promotorë të shëndetit dhe ndryshimit pozitiv në shoqëri.